Vuosterávdnjái

Deanuleagis sámástit -prošeakta buvttada áibbas ođđalágan Vuosterávdnjái-dihtorspealu, virtuála Deanuleagi, gos jođedettiin spealli oahppá sámegiela, -kultuvrra ja árbedieđu.

Hámusgovat Vuosterávdnjái-spealu oasážiin.

Vuosterávdnjái-nammasaš dihtorspealu ulbmilin lea johtit ja birget Deanuleagis. Spealli deaivida máŋggalágan fearániid ja hástalusaid, maid bokte son beassá čájehit iežas sámegiela ja -kultuvrra máhtu – ja oahppat ain lasi.

Dárkkuhussan lea spealu vugiiguin oahpahit sámegiela, kultuvrra, árbedieđu ja báikedovdamuša.

Mielde máŋggaid surggiid áššedovdit

Oahppospealu teknihkalaš oasi ollašuhttá Kajaani ámmátallaskuvlla Clever Simulation Entertainment -ovddidanjoavku. Ohcejoga gielda ja Sámi ealáhus- ja guorahallanguovddáš SEG buvttadit spealu sisdoaluid, ja doibmet daid ja sámepedagogihka áššedovdin.

Plánemis leat mielde maiddái guokte áššedovdijoavkku: nuorat ja oahpaheaddjit. Spealu sisdoalut buvttaduvvojit earret eará iešguđetlágan pilohtaid, bargobájiid, giellaleairraid ja boares olbmuid jearahallamiid bokte.

Dasa lassin spealu pilohtaid geahččalit áššedovdinuorat, geaid prošeakta lea bálkkáhan sihke Suoma ja Norgga bealde.

Virtuála Deanuleahki?

Speallu sisttisdoallá sihke albma Deanuleagi báikkiid ja maiddái hutkojuvvon birrasiid.

Deanuleagi báikkiin dahkkojuvvojit 3D-mállet referánsagovain, dronegovvemiin, guovllu laserdatain ja fotogrammetriijain. Spealus leat mielde earret eará báikkit Deanuleagi luonddus, giliin ja čoahkkebáikkiin.

Speallobiras ovddiduvvo Unreal Engine speallomohtoriin ja C++-prográmmeremiin, ja dat dahkkojuvvo PC-vuđđui.

Buohkaid atnui

Spealu sáhttá luđet nuvttá iežas dihtorii. Ulbmilin lea, ahte dainna ávkkástalašedje boahtteáiggis maiddái skuvlaoahpahusas. Speallobirrasa gráfalaš olggosoaidnu ja eará sisdoalut ollašuhttojit nu, ahte spealu sáhttet speallat nu máŋgasat go vejolaš.

Vuosterávdnjái-spealu plánenbargu álggii cuoŋománus 2019 ja speallu gárvvásmuvvá loahppagease 2022.