Vihtta sámenuora bargagohtet Deanuleagis sámástit -prošeavtta spealloáššedovdin – “Orru hui somá, go iežas speallamis lea ávki”
Viđa áššedovdinuora bargun lea giđa 2021 áigge speallat máŋggalágan spealuid, iskat Vuosterávdnjái-spealu pilohtaid ja buktit jurdagiid spealu sisdoaluide.
Deanuleagis sámástit -prošeakta lea bálkkáhan vihtta sámenuora bargat iežas dihtorspealu áššedovdin.
Deanuleagis sámástit -prošeakta almmustahttá loahppagease 2022 iežas Vuosterávdnjái-dihtorspealu, man fáddán leat Deanuleagi sámegiella ja kulturárbi. Dihtorspealus spealli johtá virtuála Deanuleagis, gos son deaivá máŋggalágan hástalusaid. Daid bokte son beassá čájehit iežas sámegiela ja -kultuvrra máhtu – ja oahppat ain lasi. Speallu lea oaivvilduvvon vuosttassajis sámenuoraide, ja dan dihte prošeakta lea hálidan sin mielde spealu ovddideapmái.
Áššedovdinuorran leat bálkkáhuvvon 12-jahkásaš Hánsa-Niillas Aikio Ohcejogas, 13-jahkásaš Niillas Áilu Gaup Beaska Fanasgiettis,14-jahkásaš Isak Pieski Ohcejogas, 14-jahkásaš Sáve Mariette Porsanger Malin Deanušalddis ja 14-jahkásaš Ivvár Niillas Somby Wilhelmsen Gárdagas.
Ohcejohkalaš Hánsa-Niillas Aikio liiko speallat asttuáiggistis, ja dan dihte bargu Vuosterávdnjái-spealu áššedovdin lea sutnje dego niehku.
– Lea somá beassat fárrui dákkárii ja bargat eiddo dan, masa liiko. Lea buorre, ahte sámegiella ja -kultuvra oidnojit spealuin. Orru suohtas, ahte oaččun ieš váikkuhit spellui ja hutkat dasa sisdoaluid, Aikio muitala.
Deanuleagis sámástit -prošeavtta buot golbma prošeaktaguoimmi oassálastet spealu dahkamii.
Spealu teknihkalaš oasi ollašuhttá Kajaani ámmátallaskuvlla Clever Simulation Entertainment -spealuidovddidanjoavku. Ohcejoga gielda ja Sámi ealáhus- ja guorahallanguovddáš buvttadit spealu sisdoaluid, ja doibmet daid ja sámepedagogihka áššedovdin.
Okta prošeavtta golmma prošeaktahoavddas, Kyösti Koskela Kajaani ámmátallaskuvllas, jáhkká nuoraid buktit olu buori spellui.
– Lea hui dehálaš ja máilmme fiinna ášši, ahte fidniimet spealu čuozáhatjoavkku, nuoraid, min veahkkin jo ná árramuttus. Nuorain lea ollu vásáhus earálágan spealuin ja hui čielga jurdagat das, makkár áššit dahket miellagiddevaš ja somás speallanvásáhusa.
– Mun vuorddán sis olu ideaid ja oainnuid vuoi oažžut áigái nuoraid mielas geasuheaddji spealu, Koskela jurddaša.
Viđa áššedovdinuora bargun lea giđa 2021 áigge speallat máŋggalágan spealuid, iskat Vuosterávdnjái-spealu pilohtaid ja buktit jurdagiid spealu sisdoaluide. Sii besset earret eará smiehtadit, makkár biktasat spealu figuvrrain leat.
Vuosttas deaivvadeapmi dollojuvvui koronaráddjehusaid dihte neahta bokte 9.2.
Ohcejohkalaš Hánsa-Niillas Aikio liiko speallat asttuáiggistis. Son illudage dál, go iežas speallamis lea dákkár ávki. Govva: Aletta Lakkala
Áššedovdinuorran válljejuvvon ohcejohkalaš Hánsa-Niillas Aikio doamai dalán vuosttas deaivvadeami maŋŋá geahččaladdat spealuid, maid prošeakta lea čohkken áššedovdinuoraid barggu váras. Su miela ligge dat, ahte speallanmáilbmi buktojuvvo ovdan buorre áššin.
– Orru hui somá, go iežas speallamis lea ávki. Nu ollu gullá ságaid das, ahte speallan lea monu heittot, Aikio smiehtada.
Vuosterávdnjái-spealu plánenbargu álggii cuoŋománus 2019 ja speallu gárvvásmuvvá loahppagease 2022. Speallu lea oaivvilduvvon vuosttassajis skuvlaoahpahusa bargoreaidun, muhto dan sáhttá maid juohkehaš luđet iežas dihtorii. Sáhtát lohkat spealu birra eambbo dáppe.
Deanuleagis sámástit -prošeakta ozai spellui áššedovdinuoraid rabas ohcama bokte skábmamánus.