Sámegielat mánáide álgá čakčat iežaset speallanskuvla neahtas – Almmut máná beroštumis dál!
Deanuleagis sámástit ja School of Gaming leat dán giđa piloteren sámegielat neahttaspeallanskuvlla Deanuleagi mánáiguin. Doaibma lea lihkostuvvan nu bures, ahte dál ulbmil lea fállagoahtit dan buot sámegielat mánáide.
Sámegielat mánáide álgá čakčat 2021 iežaset speallanskuvla neahtas!
Deanuleagis sámástit ja suopmelaš School of Gaming -speallanskuvla (SOG) leat dán giđa piloteren golbma sámegielat neahttaspeallanrieggá Deanuleagi mánáiguin. Speallanrieggát leamašan Minecraft-rieggát, 7–8-jahkásaččaide oaivvilduvvon Blohkkaoaivvi eallin ja badjel 9-jahkásaččaide oaivvilduvvon Mátkkis Minecraft-meašttirin. Juohke rieggái leat oassálastán vahkkosaččat nuppelot sámegielat máná Deanuleagi guovllus sihke Suomas ja Norggas.
Rieggát leat leamaš nu bivnnuhat, ahte mii leat mearridan joatkit daid čakčat – ja seammás viiddidit daid buot sámegielat mánáid olámuddui!
SOG atná dehálažžan fállat sámemánáide seamma vejolašvuođaid go earáide
School of Gaming lea lágidan mánáid ja nuoraid speallanskuvlla neahtas dál sullii jagi, ja fállá dán dilis rieggáid jo guđa gillii: davvisámegiela lassin suoma-, ruoŧa-, eaŋgas-, spánska- ja seavagillii.
Skuvlla rektor lea hui duđavaš, go leat sáhttán fállagoahtit rieggáid maid sámemánáide sin iežaset gillii.
– Min doaimma okta dovdocealkka lea, ahte speallobajásgeassin gullá buohkaide, dieđusge maiddái sámegielat mánáide, dadjá School of Gaming rektor Mikko Perälä.
School of Gaming rektor Mikko Perälä atná dehálažžan, ahte maiddái vehádahkii gullevaš mánát ožžot asttuáiggedoaimmaid iežaset gillii. Govva: SOG
Speallanrieggáin mánát fearánastet nuppiideasetguin ámmátspeallobajásgeassi bagadusas. Rieggáin ii goittotge leat sáhka dušše beare speallamis. SOG rieggáid bajásgeassinulbmilat leat earret eará ođđa skihpáriidda oahpásmuvvan, sosiála gaskavuođaid doallan, neahttaláhtten, dovdodáiddut, ovttasoahppan, ovttasbargu, iežasdovdan ja gulahallandáiddut.
Okta hui dehálaš ulbmil lea maiddái hukset mánáide oadjebas servoša, mas sii besset oahpásmuvvat nuppiidasaset guhkesge gaskkaid duohken.
– Leamašan nu fiinnis oaidnit, mo ovdamearkka dihte boaittobeal guovlluid mánát leat ožžon speallanskuvlla ánssus ođđa ustibiid ja seamma vejolašvuođaid, go gávpotmánát, Perälä joatká.
Riikkarájáid rasttildeaddji speallanrieggáin lunddolaš giellan šaddá sámegiella
Spealut geasuhit mánáid ja nuoraid, ja dan dihte lea dehálaš fállat maid sámegillii dákkár doaimma, oaivvilda prošeaktahoavda Kati Eriksen.
Deanuleagi mánáid speallanrieggáin leat dán giđa leamašan buot joavkkuin mánát sihke Suomas ja Norggas. Das leamašan positiiva váikkuhus mánáid sámegiela geavaheapmái.
Deanuleagis sámástit -prošeavtta hoavda Kati Eriksen illuda, go Deanuleagi speallanrieggáid pilohtat lihkostuvve nu bures. Govva: Sonja Sistonen / Ohcejohka
– Min rieggáin oasseváldit, gamerat, leat leamašan goappat beal rájá. Sin oktasaš giella lea sámegiella, mii lea dan dihte šaddan hui lunddolaččat maiddái rieggáid giellan.
Mánát ja nuorat ohppet dán áigge ovdamearkka dihte eaŋgasgiela dávjá dainna, go spellet neahta bokte earáiguin miehtá máilmmi. Dán leat geavahan mállen maiddái Deanuleagi speallanrieggáin.
– Mii geavahit áibbas dan seamma logihka sámegiela hárrái, Kati Eriksen čilge.
Almmut máná beroštumis čavčča rieggáide dál!
Deanuleagis sámástit ja SOG ulbmil lea fállagoahtit sámegielat speallanrieggáid boahtte čavčča vejolašvuođaid mielde buot sámegielat mánáide.
Jos du mánná lea beroštuvvan oassálastit čavčča rieggáide, almmut das midjiide skoviin SOG neahttasiiddus 31.7. rádjai! Fuom. Čavčča rieggáin sáhttet leat mánotbaimávssut. Mii muitalat eambbo, go ruhtadoarjagat leat čielgan. Almmut máná beroštumis das fuolakeahttá, skovi deavdin ii vuos čana du masage!
School of Gaming ohcá maiddái lasi sámegielat speallobajásgeassiid. Jos leat sámegielat olmmoš, beroštuvvan háhkat lassidietnasa ja liikot bargat mánáiguin, guođe iežat ohcamuša SOG neahttasiiddus!
Deanuleagis sámástit -prošeaktahoavda Kati Eriksen
+358 40 594 5060
School of Gaming
Deanuleagis sámástit lea guovttejahkásaš (2020–2022) Interreg Davvi -prošeakta, mii nanusmahttá Deanuleagi sámegiela, -kultuvrra ja árbedieđu earret eará sámegielat ja rájá rasttildeaddji asttuáiggedoaimmaiguin.