Ohcejoga giellaguovddáža namman šaddá "Giellagárdi" – nammagilvvus buorre sálaš
Deanuleagis sámástit -prošeavtta nammagilvui bohte mearreáiggis 13 evttohusa, main “Giellagárdi” šattai prošeaktaveaga jiellahin dan máŋggaid, Deanuleahkái heivvolaš mearkkašumiid dihte.
Ohcejoga ođđa giellaguovddáža namman šaddá “Giellagárdi”.
Deanuleagis sámástit -prošeakta vuođđuda jagi 2021 Ohcejoga girkosiidda Áilegas-guovddážii sámi giellaguovddáža, ja ozai dasa heivvolaš nama nammagilvvu bokte. Nammagilvui bohte gilvoáiggis 14.12.2020–10.1.2021 buohkanassii 13 evttohusa, main “Giellagárdi” šattai prošeaktaveaga jiellahin dan máŋggabealat mearkkašumiid dihte.
– Máŋggaid buriid evttohusaid siste loktanii Giellagárdi-namma min jiellahin. Namma lei vuohkkasit ákkastallojuvvon, dan lea álki muitit, čállit ja jietnadit, ja dat lea logalaš. Giellagárdi heive bures guovllu olbmuid gillii ja millii, smiehtada Deanuleagis sámástit -prošeavtta hoavda Kati Eriksen.
Nammagilvvu vuoiti, Giellagárddi-nama evttohan Mira Rauhala Oulus fuomášii sáni erenomáš máŋggabealat mearkkašumiid ja muitalii daid birra vuđolaččat ákkastallamiinnis.
Giellagárddi namas guktot oasit, sihke “giella” ja “gárdi”, sisttisdollet máŋggaid mearkkašumiid, mat laktásit earret eará boazobargguide ja rievssatgárdumii – ja dieđusge maid gillii.
– Namas leat moaddege mearkkašumi ovdamearkka dihte badjebargguid gárddis rievssatgárdumii. Dás de bohciida duppalmearkkašupmi guovllu ealáhusas, Rauhala čálii.
Giellagárddis šaddá Ohcejoga gieldda sámegielat doaimmaid guovddáš. Guovddáš fállá bálvalusaid, doaimmaid ja dáhpáhusaid sámegillii, ja doarju Ohcejoga gieldda sámegiela nannemis.
Giellagárddi doaibman lea plánejuvvon earret eará doallat kurssaid ja skuvlejumiid, fállat rávvema sámegillii ja máŋggagielatvuhtii guoskevaš áššiin, ordnet jorgalan- ja dulkonbálvalusaid, ja lágidit rájá rasttildeaddji sámegielat dáhpáhusaid ja asttuáiggedoaimmaid. Doaimmaide sáhttá oahpásmuvvat dárkilabbot dákko.
Guovddáš bargá nana ovttasbarggu eará giellaguovddážiiguin rájá rastá. Okta lagamus ovttasbargoguimmiin lea Deanu gieldda giellaguovddáš, Deanu giellagáddi – ja dange geahččanguovllus “Giellagárdi” orru erenomáš heivvolaš namma prošeaktahoavdda bealljái.
– Giellagáddi ja Giellagárdi, dego currežat!, Kati Eriksen illuda.