Deanuleagis sámástit fállá Ohcejot gieldda bargiide sámegiel oahpahusa – vuosttas kursa šattai nu dievva, ahte juhkkojuvvui guovtte oassái
Aiddo dál prošeavttas lea jođus sámegiela álgokursa, masa oassálastet gáiddusin 16 bargi miehtá gieldda. Prošeakta lea álggaheamen maiddái čállinkurssaid sihke daidda, geat eai leat beassan oahppat čállit sámegiela ja daidda, geat juo máhttet ja hálidit lasi čállinhárjehusa.
Deanuleagis sámástit -prošeakta fállá dán giđa sámegiel skuvlejumiid Ohcejot gieldda bargiide. Skuvlejumiid lea ulbmil sajáidahttit oassin Ohcejoga Giellagárdi-giellaguovddáža doaimmaid. Deanuleagis sámástit vuođđuda Giellagárddi jagi 2021 áigge.
Vuosttas sámegiel kursa lea jo jođus. Sámegiela álgokursa lea aiddo álgán ja fárrui leat beassan buohkat, geat leat almmuhan beroštumi oahppat sámegiela. Kursa leamašange nu bivnnut, ahte joavkku leat šaddan juohkit guovtte oassái. Oktiibuot álgokurssas leat fárus 16 bargi birra gieldda.
Kurssa oahpaha neahta bokte Joni Saijets. Son lea eret Gáregasnjárggas, muhto orru dál Kolumbias ja oahpaha sámegiela gáiddusin Ohcejoga gieldda ja Sámedikki oktasaš gáiddusoahpahusfidnus sámeguovllu olggobeale mánáide – ja dál maiddái Ohcejot gieldda bargiide. Álgokursa bistá miessemánu lohppii.
Deanuleagis sámástit lea álggaheamen gieldda bargiide maiddái čállinkurssaid. Ulbmil lea fállat oahpahusa sihke daidda, geat eai leat beassan oahppat čállit sámegiela ja daidda, geat juo máhttet ja hálidit lasi čállinhárjehusa.
Skuvlejumiid lea dehálaš fállat máŋgga dásis vuoi juohkehažžii gávdno heivvolaš oahpahus, muitala prošeavtta máŋggagielatvuođa áššedovdi Laura Arola.
– Go ovdamearkka dihte álgokursa álggii, fuomášeimmet, ahte mis leat doppe olbmot, geat leat áibbas álggus ja de maiddái olbmot, geat máhttet juo. Mii leat juohkán kurssa guovtte jovkui vai oahpahusjoavkkut eai leat nu stuorrát ja vai juohkehaš beassá hárjehallat heivvolaš dásis.
– Boahtteáiggis lea ulbmil, ahte Giellagárdi sáhttá jođánit reageret giellaoahppandárbbuide ja lágidit iešguđetlágan joavkkuide heivehuvvon kurssaid, Arola joatká.
Deanuleagis sámástit almmuha giellaskuvlejumiinis eanaš gieldda siste. Jos leat beroštuvvan gullat lasi, sáhtát leat oktavuođas prošeavtta máŋggagielatvuođat áššedovdi Laura Arolai laura.arola@utsjoki.fi, tel. +358 40 480 1301.