Buresboahtin sámegielat speallanskuvlii! Deanuleagis sámástit ja School of Gaming fállagoahtiba mánáide áibbas ođđalágan asttuáiggedoaimmaid neahtas
School of Gaming, guhte ordne suomagielat neahttaspeallanrieggáid mánáide miehtá máilmmi, álggaha cuoŋománus sámegielat speallanrieggáid!
Deanuleagis sámástit -prošeakta ja suopmelaš School of Gaming -spealloskuvla (SOG) álggaheaba mearkkašahtti ođđa ovttasbarggu. School of Gaming, guhte ordne suomagielat neahttaspeallanrieggáid mánáide miehtá máilmmi, álggaha cuoŋománus maid sámegielat speallanrieggáid!
Sámegielat speallanrieggáid lea ovddidan Deanuleagis sámástit -prošeakta. Jearaldagas lea guovttejahkásaš Interreg Davvi -prošeakta, mii nanusmahttá Deanuleagi sámegiela, -kultuvrra ja árbedieđu earret eará máŋggalágan sámegielat, rájá rasttildeaddji asttuáiggedoaimmaiguin.
Vuosttas speallanrieggát leat oaivvilduvvon Deanuleagi mánáide, muhto ulbmil lea fállat rieggáid fargga buohkaide
School of Gaming álggaha cuoŋománus vahkus 16 golbma sámegielat Minecraft-rieggá, mat leat oaivvilduvvon iešguđet dáidodásiid ja ahkejoavkkuid mánáide.
Vuosttas sámegielat speallanrieggát leat dárkkuhuvvon Deanuleagis sámástit -prošeavtta čuozáhatjovkui, Deanuleagi mánáide ja nuoraide sihke Suoma ja Norgga bealde. Ulbmil goittotge lea, ahte boahtteáiggis rieggáide sáhtášedje oassálastit buot doaimmas beroštuvvan mánát ássanbáikái geahčakeahttá.
Jos du mánná orru Deanuleagi olggobealde ja livčče beroštuvvan sámegielat neahttaspeallanrieggáin, almmut das midjiide šleađgapoastan jogo prošektii samastit@utsjoki.fi dahje SOG:ii kanslia@sog.gg!
Mii čielggadat beroštumi sámegielat speallanrieggáide ja čohkket ođđa joavkkuid dalán, go gávdnat doarvái oassálastiid. Jos dieđát geannu, gii sáhtášii leat beroštuvvan rieggáin, cavgil áššis maid sutnje!
Rieggáin mánát ohppet speallama lassin gulahallan-, ovttasbargo- ja dovdodáidduid
Vuosttas sámegielat speallanrieggát leat 7–8-jahkásaččaide oaivvilduvvon “Blohkkaoaivvi eallin” ja badjel 9-jahkásaččaide dárkkuhuvvon “Mátkkis Minecraft-meašttirin”. Sáhtát lohkat rieggáid dárkilis govvádusaid SOG neahttasiiddus.
Rieggáin mánát fearánastet nuppiideasetguin ámmátspeallobajásgeassi bagadusas. Rieggáin ii goittotge leat sáhka dušše beare speallamis! SOG rieggáid bajásgeassinulbmilat leat earret eará ođđa skihpáriidda oahpásmuvvan, sosiála gaskavuođaid doallan, neahttaláhtten, dovdodáiddut, ovttasoahppan, ovttasbargu, iežasdovdan ja gulahallandáiddut.
Speallobajásgeassit dorjot mánáid iešdovddu positiivvalaš máhcahagain ja gulahallamiin, ja deattuhit mánáid iežaset ovddasvástádusa váikkuhit dasa, ahte speallanbirrasis lea buohkain somá. Rieggáin lea dehálaš, ahte mánná beassá dahkat áššiid, main son lea beroštuvvan. Lea maid dehálaš, ahte mánás lea oadjebas dovdu ovdanbuktit iežas rieggás, ja ahte son dovdá oktiigullevašvuođa ja iežas oassin dán stuorát servošis.
Minecraftiin lea ulbmil hukset ustitlaš speallanbirrasa, gos mánát barget stuorát ovttasbargoprošeavttaid. Dát gáibida skihkalašvuođa ja gierdavašvuođa, ja dáid dáidduid rieggáin beassá hárjehallat. Rieggáin leat molsašuddi temát, mat laktásit miellagiddevaš ja áigeguovdilis áššiide.
Rieggát joatkašuvvet mihcamáraid rádjai, čakčat čohkkejuvvojit ođđa joavkkut
Giđa rieggát dollojuvvojit oktii vahkus ja joatkašuvvet gitta 24.6. rádjai. Čakčat rieggát joatkašuvvet ođđa joavkkuiguin ja áigetávvaliiguin, mii almmuhat daid birra maŋŋelabbos.
Rieggáid áigetávval 19.4.–24.6.2021 (Suoma diibmoáiggit):
- 9+ vuossárggaid dmu 17–19
- 7-8-jahkásaččat gaskavahkuid dmu 17.00–18.30
- 9+ duorastagaid dmu 17–19
SOG rieggáin leat dábálaččat oassálastinmávssut, muhto Deanuleagis sámástit -prošeakta fállá rieggáid Deanuleagi mánáide nuvttá giđđat 2021.
Mánná sáhttá oassálastit rieggáide, vaikko ii livčče speallan Minecraft ovdal. Son dárbbaša rieggá váras dihtora, Minecraft-spealu ja nuvttá Discord-prográmma jogo telefovnnas dahje dihtoris. Rieggá speallit ja speallobajásgeassi gulahallet gaskaneaset Discord bokte.
Almmut máná rieggáide maŋimustá gaskavahku 14.4., almmuhanskovvi gávdno SOG neahttasiiddus!
Deanuleagis sámástit -prošeaktahoavda Kati Eriksen
+358 40 594 5060
School of Gaming