Buresboahtin sámegiel neahttayogai juohke maŋŋebáreahket! Kundalini ja yin yoga -bottut heivejit buohkaide
Buohkaide rabas yoga-bottut dollojuvvojit juohke maŋŋebárgga dmu 19.30–21.00 Suoma áiggi, dmu 18.30–20.00 Norgga áiggi.
Deanuleagis sámástit -prošeakta fállá vahkkosaččat buohkaide rabas sámegiel yoga-bottuid neahtas!
Sámegiel yoga-bottut dollojuvvojit juohke maŋŋebárgga dmu 19.30–21.00 Suoma áiggi, dmu 18.30–20.00 Norgga áiggi gitta njukčamánu 2022 lohppii.
Deanuleagis sámástit -prošeavtta neahttayogat leat oalát sámegillii. Yogat leat nuvttá ja rabas buohkaide, ja heivejit maid easkkaálgiide. Boađe donge!
Yogaid doallaba yin yoga -oahpaheaddji Gunvor Guttorm ja kundaliniyoga-oahpaheaddji Berit Nystad.
Yogat dollojuvvojit Zoom bokte ja daidda beassá álo dán liŋkkas: Zoom.us.
Váimmolaččat buresboahtin yogastallat!
Kundaliniyoga
Kundaliniyoga-bottuid doallá kárášjohkalaš Berit Nystad, guhte lea KRI oahppan kundaliniyoga-oahpaheaddji joatkkaoahpu dásis. Nystad lea maid oahppan goŋŋačuojaheaddji, ja jođiha goŋŋameditašuvnnaid ja vuoiŋŋastemiid goŋŋašuoŋaide.
Berit Nystad jođiha Davvi Yoga ja oahpaha yoga sihke ruovttubáikkistis Kárášjogas ja neahta bokte. Son lea doallan maid vahkkoloahpa deaivvademiid, retreataid ja yogabagademiid ovttat olbmuide.
Kundaliniyoga-bottuin lea ollu vanahallan, muhto maiddái ieš guđetge vuoigŋanvuogit ja oanehis kundaliniyoga kriyat. Fysálaš lihkademiid maŋŋá lea vuoiŋŋasteapmi ja mediteren.
– Meditašuvdna lea dehálaš oassi kundaliniyogas, dasgo rumaš, miella ja siellu gullet oktii. Miela dilli váikkuha rupmašii ja rupmaša veadjingis millii. Ja buot dieid bajábealde lea siellu mii lea olbmo “váimmus”, dat duohta “don”, Nystad govvida yogabottuidis.
Juohke yogaboddu álgá Ong Namo Guru Dev Namo mantrain ja loahpahuvvo Sat Nam mantrain.
Yin yoga
Yin yoga doallá yoga-oahpaheaddji Gunvor Guttorm. Guttorm lea oahppan ashtanga yoga -oahpaheaddji ja lea váldán lassioahpu yin yogas gitta čiekŋudeaddji oahpuid rádjai.
Guttorm lea yogastallan jeavddalaččat, masá beaivválaččat, 15 jagi. Son lea doallan yogaklássaid earret eará Guovdageainnus ja Johkamohkis.
Yin yoga lea ráfálaš ja terapeuhtálaš yogastallan, mii sisttisdoallá guhkes fanahemiid. Yin yoga ráfoha goruda ja miela. Dat heive erenoamážit olbmuide, geain leat deahkit bákčasat ja stirdon, molsašuddi miella, váibasat dahje ráfehis dovdu.