Buresboahtin čuovvut Sámi giellarávvehat 2.0 -filbmaráiddu! Deanuleagis sámástit ja Sámediggi almmustahttet juohke mánus prográmma bearrašiid gielladoarjjan
Filbmaráidu lea oaivvilduvvon sámegielat ja sámegiela ealáskahtti mánáid ja nuoraid fuolaheaddjiide ja lagasolbmuide, ja maiddái ámmátolbmuide, geat barget mánáiguin, nuoraiguin ja bearrašiiguin.
Buresboahtin čuovvut ođđa Sámi giellarávvehat 2.0 -filbmaráiddu!
Sámi giellarávvehat 2.0 lea joatkka Sápmelaš giellarávvehahkii, man Davvi-Suoma sosiálasuorggi máhttinguovddáš, Suoma Sámediggi ja Ohcejoga gielda buvttadedje ovttasbargun jagiid 2018–2019.
Sámi giellarávvehat 2.0 -filbmaráiddu buvttadit Deanuleagis sámástit -prošeakta ja Suoma Sámediggi. Filbmaráiddus ságastallet sámegiela geavaheamis ja guovtte- ja máŋggagielatvuođas sámegielat dahje sámegiela ealáskahtti bearrašiin, ja maiddái mánáid ja nuoraid gaskkas. Ságastallamat leat eanaš davvisáme- ja anárašgillii, ja oassi maid suomagillii.
Filbmaráidu lea oaivvilduvvon sámegielat ja sámegiela ealáskahtti mánáid ja nuoraid fuolaheaddjiide ja lagasolbmuide, ja maiddái ámmátolbmuide, geat barget mánáiguin, nuoraiguin ja bearrašiiguin.
Filbmaráiddus ságastallaba máŋggagielatvuođa áššedovdi Laura Arola Deanuleagis sámástit -prošeavttas Ohcejoga gielddas ja giellabeassejođiheaddji Niina Aikio-Siltala Suoma Sámedikkis. Soai leaba guktot sihke giellasuorggi bargit ja sámegielat mánáid vánhemat. Maŋŋelabbos ráiddus sáhttet leat mielde maiddái eará ságastallit ja áššedovdit.
Sámi giellarávvehat 2.0 -filbmaráiddu vuosttas oasit:
- Smávva mánát ja sámegiela earálágan dilit bearrašiin
- Bearrašiid giellastrategiijat
- Stuorát mánáid ja nuoraid gielladilli ja sin giellalávddit
Boahtteáiggis ráiddus lea ulbmil ságastallat earret eará bearraša giellaáššiin molsašuddi diliin ja sámegiela sirdimis mánáide dalle, go vánhen ii ieš hála giela. Filbmaráiddus suokkardallet maiddái sámegiela dili bearrašiin sámeguovllu olggobealde.
Filbmaráiddu oasit almmustahttojit Deanuleagis sámástit -prošeavtta Youtube-kanálas oktii mánus, juohke mánu beallemuttus.
Vuosttas oassi “Smávva mánát ja sámegiela earálágan dilit bearrašiin” almmustahtto Youtubes bearjadaga 16.4., beasat geahččat prográmma dákko!